शिक्षणाच्या गुणवत्तावाढीवर भर
भूमीराजा प्रतिनिधी/संतोष मोरे
बाळापूर : स्थानिक न.प. उर्दू प्राथमिक शाळा क्र. ६, फोर्ट येथे नुकतीच पालक सभा उत्साहपूर्ण वातावरणात पार पडली. या कार्यक्रमात मोहम्मद कलीम (प्रशासन अधिकारी), डॉ. फैय्याज हुसैन, मो. अकरम, नसीर हुसैन, मुख्याध्यापक खालिद अहमद, सर्व शिक्षक तसेच मोठ्या संख्येने पालकांनी उपस्थित राहून विद्यार्थ्यांच्या शिक्षण व त्यांच्या भवितव्याशी संबंधित महत्त्वाच्या विषयांवर चर्चा केली.
कार्यक्रमादरम्यान वक्त्यांनी शिक्षणाचे महत्त्व अधोरेखित करत सांगितले की, मुलांच्या उज्ज्वल भविष्यासाठी शिक्षण हा सर्वात भक्कम पाया आहे. त्यांनी पालकांना आवाहन केले की, मुलांच्या अभ्यासाकडे नियमित लक्ष द्यावे आणि शाळेसोबत सहकार्य करून त्यांच्या सर्वांगीण विकासासाठी प्रयत्न करावेत.
बैठकीत विद्यार्थ्यांच्या शैक्षणिक प्रगतीचाही सविस्तर आढावा घेण्यात आला. शिक्षकांनी विद्यार्थ्यांच्या अभ्यास, शिस्त व प्रगतीबाबतची माहिती पालकांसमोर मांडली आणि मुलांना पुढे नेण्यासाठी पालक व शाळेने एकत्रितपणे प्रयत्न करण्याची गरज असल्याचे सांगितले.
याशिवाय सभेत शाळेच्या विकासाशी संबंधित काही महत्त्वाचे प्रस्तावही मांडण्यात आले.यामध्ये इयत्ता पाचवी सुरू करण्याची योजना तसेच वाढत्या विद्यार्थीसंख्येच्या पार्श्वभूमीवर नवीन शाळेची इमारत उभारण्याचा प्रस्ताव प्रमुख होता. या प्रस्तावांचे पालक व व्यवस्थापनाने स्वागत करत शिक्षणासाठी उत्तम वातावरण निर्माण करण्यास सहकार्य देण्याचे आश्वासन दिले.कार्यक्रमाचा समारोप विद्यार्थ्यांचा उत्साह, पालकांचा सहभाग आणि शाळेच्या उज्ज्वल भविष्यासाठी शुभेच्छा व्यक्त करून करण्यात आला. आयोजकांनी सांगितले की अशा कार्यक्रमांमुळे शाळा आणि पालकांमधील समन्वय अधिक बळकट होतो आणि विद्यार्थ्यांच्या शिक्षणाला नवी दिशा मिळते.
