योगेश घायवट प्रतिनिधी भूमीराजा
अकोला : अकोला शहरातील जूने शहर पोलीस स्टेशन हद्दीत काल रात्री दोन गटात तुफान दगडफेक झाली आहे. शेकडो लोक समोरासमोर आले असून दहशत माजवण्याचा प्रयत्न करत होते. दोन गटात झालेल्या या तुफान दगडफेक आणि दंगलीमध्ये एकाचा मृत्यू तर चार ते पाच जण जखमी झाले आहेत. तर अनेक वाहनांची तोडफोड झाली असून त्यात चारचाकी वाहनांची मोठ्या प्रमाणात तोडफोड आणि जाळपोळ झाली आहे.
दरम्यान, दंगलीतील अनेक लोकांना अटक करण्यात आली असून आता परिस्थिती नियंत्रणात आणण्यात पोलिसांना यश आलं आहे. कुणीही अफवांवर विश्वास ठेवू नये, असं अकोला पोलिसांकडून नागरिकांना आवाहन करण्यात येत आहे. घटनेची माहिती मिळताच रात्री भाजप आमदार रणधीर सावरकर, आमदार गोवर्धन शर्मा, आमदार वसंत खंडेलवाल तसेच जिल्ह्यातील आणि बाहेरील जिल्ह्यातील वरिष्ठ पोलीस अधिकारी घटनास्थळी दाखल झाले होते.
दोन्ही गटातील लोकांचा मोठ्या संख्येने जमाव झाला होता. रात्री उशिरापर्यंत दगडफेक सुरूच होती. हरिहर पेठ भागात चारचाकी, रिक्षा, दुचाकी वाहनांची तोडफोड अन् जाळपोळ केली आहे. रात्री पोलिसांना परिस्थितीवर नियंत्रण मिळवण्यात अनेक अडचणी येत होत्या. परिस्थिती नियंत्रण आणण्यासाठी अकोला पोलिसांची प्रचंड धावपळ उडाली आहे.
परिस्थितीवर तात्काळ नियंत्रित मिळण्यात यश यावं, अशा सूचना राज्याचे गृहमंत्री तथा अकोला जिल्ह्याचे पालकमंत्री देवेंद्र फडणवीस यांनी पोलीस विभागाला दिल्या. जमाव नियंत्रणात येत नसल्याचे पाहून पोलिसांकडून जमावांवर अश्रूधुराचा वापर करण्यात आला यासह अनेक प्रयत्न म्हणजे लाठीमारही करण्यात आला.
काल अमरावतीहून पोलीस दलाच्या तुकड्या हजर झाल्यानंतर रात्री उशिरा परिस्थितीवर नियंत्रण मिळवण्यात यश आलं. सध्या अकोला पोलिसांचा ठिकठिकाणी बंदोबस्त आहे. काल रात्रीच जिल्हाधिकारी निमा अरोरा यांच्या आदेशानं अकोला शहरात कलम १४४ लागू करण्यात आला असून दगडफेक करणाऱ्यांचा शोध सुरू आहे. सर्व नागरिकांनी शांततेत राहावे, तसेच नागरिकांनी घराबाहेर पडू नये, परिस्थिती नियंत्रणात आहे, असं आवाहन भाजप आमदार रणधीर सावरकर यांनी केलं आहे.
घटनास्थळी अकोला जिल्ह्यातील सर्वच पोलीस स्टेशनचे पोलीस अधिकारी तसेच पोलीस दाखल झाले आहेत. अमरावती जिल्ह्यातून लवकरच पोलिसांच्या काही तुकड्या दाखल झाल्या. अकोला जिल्ह्याचे जिल्हा पोलीस अधीक्षक संदीप घुगेसह अप्पर पोलीस अधिक्षक मोनिका राऊत, अकोला पोलिसांचे स्थानिक गुन्हे शाखेचे प्रमुख संतोष महल्ले, जुने शहर पोलीस स्टेशनचे पोलीस निरीक्षक सेवानंद वानखडेसह इतर अधिकाऱ्यांनी परिस्थितीवर नियंत्रण मिळवले.
